Kung Naisusulat Ang Lahat ng Panaginip

"Tonight, I can write the saddest lines."

- Pablo Neruda

Para saan ang mahihinang yabag ng aking naglalakbay na puso?

Nahuhumaling ba itong muli o nais na lamang magpakalayu-layo?

Nagmamatigas?

Naglulubid ng kasinungalingan?

Hindi ito masagot ng aking isipan.

Nauukol ba ang bawat isa sa isa pa?

O ang isa ay para sa mas marami pa?

Nagtataka, nagtatanong siya

Alin ang tama at kailan nga ba tama ang talagang tama

Masakit.

Hindi kita sasagutin.

Mananatili ka ba sa yungib ng iyong nakapinid na pantasya,

At magsasawalang-kibo sa tawag ng mapupusok na madaling-araw?

Nananabik, nagnanais ang huling dalaga ng kanyang panahon.

Paano mo hahamunin ang lipunang huwag kang husagahan

Na ikaw ay ikaw at hindi ka laging tama.

Hindi ka na niya naririnig.

Alam na niya ang sagot sa kanyang panaginip.

Musika

May isang kaibigan ang nagsabi sa akin noon ng definition ng musika. Hardcore heavy metal rocker siya at alam mong pwedeng pwede siyang mambugbog ng mga boy band lovers anumang oras. Pero sabi niya, ang mahalaga sa musika ay yung rhythm,lyrics at mensahe. Lagi ko daw iyong gagawin kapag nakikinig ako ng kahit anong genre ng music. Sabi ko sa kanya, usually ang mga deep lyrics ay nasa indie at underground music  scene at wala sa mainstream pero sinagot niya ako na hindi din. Kailangan wala daw akong bias at tingnan ang parehas na anggulo. Marami nga daw talagang basura at dekadenteng musika sa daigdig kaya kailangan daw ay matalas ako sa pagpili. Hindi kinakailangan na maging favorite ko yung kanta, ang kailangan lang daw ay napapakinggan ko ng mabuti ang mensahe nito.

 In some ways, tama naman siya dahil pagkatapos nun ay para akong nagkaroon ng “third ear”, isa pang tenga na nagpoproseso ng impormasyon sa likod ng mga awit at himig.Kapag nakikinig ako ng musika, ipinaghihiwa-hiwalay ko ang lyrics sa instumento, at ang mga instrument ay pinaghihiwa-hiwalay ko din. Sa paglipas ng panahon, eto na yung ilang nailista kong mga kanta na nabigyan ko ng sariling pagsusuri, ang iba dito ay hindi na din nakabatay sa kanta kundi nakasalalay na sa sarili kong damdamin kapag naririninig ang kanta. Paumanhin kung hindi ko na mapapasadahan ang iba pang music era.Libreng mag-comment at magdagdag ang lahat, kanya-kanyang third ear naman po tayo.=)

My Immortal- Evanesence

-          Kumbinasyon ng  magandang Vocals and instruments, umiiyak at naulilang bata

Only Hope- switchfoot

-          Lyrics , magpapakamatay para sa pag-ibig

Don’t Think twice its alright- Peter, Paul and Mary

-          Timing, guitars at lyrics, mag-asawang  inabot ng paghihiwalay habang buntis ang babae sa ibang lalaki

Miss Misery- OST ng Good Will Hunting

-          Guitars , magandang pakinggan kapag malungkot

Lady is a Vamp- Spice Girls

-          Sound mixing,lately ko na-realize na  ito ang premonition ng Spice Girls na darating si Lady Gaga sa mundo

Tender Love- ?

-          Lyrics, matagal na matagal na naghintay sa pag-ibig

D’ya know what I mean- Oasis

-          Lyrics and guitars- excommunication

Together Again-Janet Jackson

-          Lyrics, kanta para sa patay

Out of My League- Stephen Speaks

-          Kombinasyon ng Lyrics and piano, wala masyadong mensahe ang kanta, hindi rin pasado as a love song

Baba-o-Riley- The Who

-          Naghinala ako noon na ginaya dito ang soundtrack ng Baywatch pero wala akong proof.  Mahusay ang gitara at keyboards

Lady Madonna- The Beatles

-          Lyrics, kanta para sa lahat ng struggling single mothers

Hands- Jewel

-          Piano, tungkol ito sa rebolusyon. Ayaw lang aminin ni Jewel sa kanta

Mary Jane- Alanis Morissete

-          Nakakatawa pero it took me 1 year( after ma-realease ang album) para ma-realize na para sa Marijuana ang kanta na ito.

Four Seasons of Loneliness- Boyz II Men

-          Lyrics and rhythm, pwedeng pakinggan kapag gusto nating bumagal ang oras

True Colors and Time After Time- Cyndi Lauper

-          Kahit anong oras,mood o sitwasyon, eto ang dalawang kanta na pwede kong kantahin sa ulo.

Mga kanta ng RAGE Against the Machine

-          Wala silang katulad.

Cold Feet- Tracy Chapman

-          Lyrics and guitars, kamatayang walang hustisya

Kundiman at Rebolusyon

-          Sa lahat ng awitin sa R&D, ito ang pinakamadalang na nagiging paborito ng karamihan , pero kung ako ang tatanungin ay ito ang pinakamaganda sa album.

Porcelain - Red Hot Chili Peppers

-          Kanta para sa mga taong-grasa

Piece of My Heart- Janis Joplin

-          Beat and monster vocals, gusto ko din yung version ng kapatid ko

Blackbird- Sarah McLachlan

-          Guitars and vocals, regaining self- confidence and acceptance of truth

A Case of You- Joni Mitchell

-          Gitara, lyrics at vocals, kanta ng  isang nagnanais nang umuwi sa kanyang  mahal na tahanan

One Day- Matisyahu

-          Cello on the background and lyrics, dream of peace

Not Ready to Make Nice-Dixie Chicks

-          Plain and simple message- Anti-US imperialism

Awit ng Kambing- Dong Abay

-          Katotohanan

Waiting in Vain- Bob Marley

-          Beat, pagmamadali at pagtigil

Buhay ay Hindi kasing Ganda ng isang Pangarap- Buklod

-          Vocals, Reality of things

Never Been To Me- Charlene Duncan

-          Piano, May isang kaibigan na nagsabi sa akin na ito ay kanta ng isang prostitute, tapos kinanta ni Ogie Alcasid sa SOP.Imagine? Laugh Trip ang inabot namin.

Stuck in a Moment- U2

-          Husky na boses ni Bono at drums,  a song of courage ng isang batang babae

Daysleeper- REM

-          Tambourine, kinanta ko noong maging call center agent ako

Smoke- Natalie Imbruglia

-          Lyrics, isang incest victim

Unforgiven 2- Metallica

-          Kanta ito para sa lahat ng may kasalanan sa Sambayanang Pilipino

Don’t Say You Love Me- M2M

-          Guitars, against teenage pregnancy ang kanta na ito, akala ng iba na pa-tweetums lang

Wind Beneath My Wings- Bette Midler

-          Vocals and lyrics, para sa De Vera Family

Tayawan

Nagigiliw ang mga kuliglig sa simoy at anghang

Ipinagdiriwang ng mga labuyo ang mababagal  na hakbang

Nanginig sa takot ang kawawang lamiran

Natupok ng apoy ang mabuhangin na pampang.

Salat sa pagtataguan ang malinamnam na tatad

Gayundin ang pinakamaliliit na kabag

Bayawak man ay hindi nakalundag

Nasilat ng apoy sa putikang patag.

Ngunit ang nakararami pa din ang mapagpasya

Dahil sa bahay na puno ng pulot

Ang apoy ay nagkamali ng tantya

Hinabol, kinagat, kinuyog,

Bandang huli,

Nanalo ang mga bubuyog.

Nilunod ng gutom ang baboy ramo

Nakatakbo ang usa, nagitla ang dayo

Nagtiis na lamang sa saging na mabuto

Napatda ang apoy

Bukas, maglalakbay uli ito.

Makasalikut mu/ Nakatago lang

Madalas da kang agaganaka

(Madalas kitang naaalala)
Pakatandanan mung e da ka akalingwan
(Pakatandaan mong hindi kita kakalimutan)
Kapilanman
(Kailanman)
Kapilanman
(Kailanman)
Hanggang ngeni
(Hanggang ngayon)

Malagad kung mipapatudtud
(Madalang akong nakatutulog)
Maibug kong tumangis alang patda
(Gusto kong umiyak ng walang humpay)
Ugtung Aldo
(Tanghaling tapat)
Disioras ning bengi
(Disioras ng gabi)
Hanggang ngeni, habang gagawan ke ini.
(Hanggang ngayon, kahit habang ginagawa ko ito.)

Mayap ya mu sana
(Maayos lamang sana)
Mayap ka mu sana
(Maayos ka lamang sana)

"Dinukot siya dahil lumalaban daw siya sa gobyerno, masama daw siyang tao.."
"Wala pong kaaway ang anak ko, ang anak ko po ay mabait.."
"Ibalik niyo siya sa akin.."
"Hindi ako magtutulos ng kandila, alam kong buhay siya.."
"Ang masamang tao ay ang mga kumuha sa kanya.."
"Heto ang larawan niya.Nakita niyo po ba siya?"

Atitiyak ku
(Natitiyak ko)
Kalupa na ning litrato mung atsu kanaku
(Katulad ng litrato mong tangan ko)
Makasalikut ka mu.
(Nakatago ka lang.
Itinatago lamang.)

Pantunan da ka pa mu rin
(Hahanapin pa rin kita)
Andyang masakit man
(Kahit mahirap man)
Pantunan da ka pa mu rin
(Hahanapin pa rin kita)
Nanu pa man ing kasapitan
(Ano pa man ang kasapitan)
Panenayan da ka.
(Hihintayin kita.)


--- para sa desaparecidos at kanilang mga pamilya

 August 30, 2011 at 1:15am

Ang Kanta ni Elsa

Ako ay isang lobo
Kulay pulang lobo
Lumipad ngunit hindi umabot sa langit
Pumutok ako sa kalangitan
At nalaglag ng walang dangal sa kalupaan

Ako ay isang lobo
Matingkad at pulang lobo
Itinali ng pagkahigpit-higpit
Tiniis ang masakit, tiniis ang pagpilipit
Pinigil ang hiningang impit

Ako ay isang lobo
Magandang palamuting lobo
Pumutok na pala
Ginawan pa ng kanta
Tuloy, naging nursery rhyme pa

Ako ay isang lobo
Sayang na sayang daw ako
Lugi ang bumili ng lobo
Kung kinain na lamang ng buo
Napakinabangan pa sana ng husto

Hay..

Ako ngayo'y isang hangin
Ay, hindi
Parte na lang ng hangin
Hindi na ako isang lobo
Huwag ka nang malungkot bata,
Malaya na ako.


- para sa lahat ng mga kabataang naging biktima ng sex trafficking

Tatlong bulaklak mula sa aking inaanak na si Trixie

Ang Kama Ko

(Naisulat ko ito noong ako ay labing dalawang taong gulang pa lang. Wala akong in-edit, lahat ito word per word. Kung paano ko ito isinulat noon, ganun mo din siya mababasa)

Ito lang siguro ang natatanging lugar na maaaring maayos na mapagpahingahan ng pagod kong katawan. May dalawang unan, malambot na kutson at manipis na kumot, gusto ko kasi malamig. Sa lugar ding ito naiisip at napapanaginipan ko ang mga kaibigan ko, mga kaaway ko, mga crush ko rin siyempre at minsan mga multo. Naa'y nakakatakot. Pero, hindi mawawala ang aking mga pangarap, imposible man o hindi, mga pangarap na talagang hindi matutupad kung patuloy lang akong hihiga sa kama ko, mga kaaway na hindi ko na mkakabati kung patuloy kong isisiksik sa punda ng unan ang mga galit ko at mga takot sa multong hindi mawawala kung patuloy akong magtataklob ng kumot at magdamag na buksan ang ilaw. Pero siyempre, hindi ko ipagpapalit ang kama ko.

Abril 1998